by
2016-ൽ കാരുണ്യ ലോട്ടറിയുടെ ഒന്നാം സമ്മാനമായ ₹1 കോടി നേടിയ കോഴിക്കോട് സ്വദേശിയായ കോയ അരീക്കരയ്ക്ക്, പത്ത് വർഷം കഴിഞ്ഞിട്ടും സമ്മാനത്തുക ലഭിച്ചിട്ടില്ല. യാത്രയ്ക്കിടെ വാങ്ങിയ ലോട്ടറി ടിക്കറ്റിനാണ് സമ്മാനം ലഭിച്ചത്. എന്നാൽ ടിക്കറ്റിന് ചെറിയ കേടുപാടുണ്ടായിരുന്നതിനാൽ, ബാങ്ക് ഉദ്യോഗസ്ഥരുടെ നിർദേശപ്രകാരം അദ്ദേഹം ടിക്കറ്റ് ഭാഗ്യക്കുറി വകുപ്പിൽ സമർപ്പിച്ചു. പിന്നീട് ടിക്കറ്റ് വകുപ്പിന്റെ കൈവശം നഷ്ടമായിരിക്കാമെന്ന സംശയവും ഉയർന്നു.
സമ്മാനത്തുക ലഭിക്കാത്തതിനെ തുടർന്ന് അദ്ദേഹം മുഖ്യമന്ത്രിയുടെ ഓഫിസിലും ധനമന്ത്രിയുടെ ഓഫിസിലും പരാതി നൽകി. ലോട്ടറി വകുപ്പ് അന്വേഷണം നടത്തിയെങ്കിലും, സമ്മാനാർഹമായ ടിക്കറ്റ് സമർപ്പിച്ചതിന് മതിയായ തെളിവില്ലെന്ന് ചൂണ്ടിക്കാട്ടി പരാതി തള്ളി. ടിക്കറ്റ് വിറ്റ ഏജന്റിന്റെ സാക്ഷ്യപത്രവും അംഗീകരിച്ചില്ല. പിന്നീട് കോടതി കോയയുടെയും ലോട്ടറി ഏജന്റിന്റെയും വാദം കേട്ട് വിഷയം വീണ്ടും പരിഗണിക്കാൻ ലോട്ടറി വകുപ്പിനോട് നിർദേശിച്ചെങ്കിലും, തുടർനടപടികൾ ഉണ്ടായിട്ടില്ലെന്നാണ് റിപ്പോർട്ട്.
കോയ മുൻ ലോട്ടറി ഏജന്റാണ്. വർഷങ്ങൾക്കുമുമ്പ് ലോട്ടറി വ്യാപാരത്തിൽ ഉണ്ടായ നഷ്ടത്തെ തുടർന്ന് വലിയ കടബാധ്യതയിലായി. വീടും സ്ഥലവും വിറ്റ ശേഷവും ഇപ്പോഴും ലക്ഷക്കണക്കിന് രൂപയുടെ കടമുണ്ട്. ഭാര്യയോടും മക്കളോടും കൂടി വാടകവീട്ടിൽ താമസിക്കുന്ന അദ്ദേഹം, വാടകയ്ക്ക് എടുത്ത ഓട്ടോറിക്ഷ ഓടിച്ചാണ് ജീവിതം മുന്നോട്ട് കൊണ്ടുപോകുന്നത്. അർഹമായ സമ്മാനത്തുക ഒരുദിവസമെങ്കിലും ലഭിക്കുമെന്ന പ്രതീക്ഷയിലാണ് അദ്ദേഹം ഇപ്പോഴും കഴിയുന്നതെന്ന് റിപ്പോർട്ടിൽ പറയുന്നു.
