by തിരുവനന്തപുരം വിളവൂർക്കൽ പൊറ്റയിൽ ഒരു വയസ്സുള്ള ഇവാന എന്ന കുഞ്ഞ് സ്വന്തം അമ്മയുടെ കൈകളാൽ കൊല്ലപ്പെട്ട സംഭവം നാടിനെയാകെ വിതുമ്പലിലാഴ്ത്തിയിരിക്കുകയാണ്. ഭർത്താവ് അഭിജിത്തും ഭർതൃ മാതാപിതാക്കളും വീട്ടിൽ ഇല്ലാത്ത സമയത്താണ് കിടപ്പുമുറിയിൽ വെച്ച് അമ്മ ക്രിസ്റ്റി കുഞ്ഞിനെ വകവരുത്തിയത്. സംഭവത്തിനു ശേഷം ജീവനൊടുക്കാൻ ശ്രമിച്ച ക്രിസ്റ്റി നിലവിൽ ആശുപത്രിയിൽ ചികിത്സയിലാണ്.
കുഞ്ഞ് ഇവാനയുടെ (അന്ന) ഭൗതികദേഹം വിളവൂർക്കലിലെ വീട്ടിലെത്തിച്ചപ്പോൾ നെഞ്ചുപൊട്ടുന്ന രംഗങ്ങൾക്കാണ് നാട് സാക്ഷ്യം വഹിച്ചത്. ചേദനയറ്റ മകളെ കണ്ട പിതാവ് അഭിജിത്തിന്റെ സങ്കടവും അന്ത്യചുംബനവും കണ്ടുനിന്നവർക്ക് കണ്ണീരടക്കാനായില്ല. വെള്ള ഫ്രോക്കണിയിച്ച് റോസാപ്പൂക്കൾ അർപ്പിച്ച കുഞ്ഞിന്റെ മൃതദേഹം അന്തിമോപചാര ചടങ്ങുകൾക്ക് ശേഷം വീടിനുള്ളിലെ മുറിയിൽ സജ്ജമാക്കിയ കുടീരത്തിൽ സംസ്കരിച്ചു.
കുടുംബാംഗങ്ങൾ തമ്മിലുള്ള സംശയവും അകൽച്ചയുമാണ് ഇത്തരമൊരു കടുംകൈ ചെയ്യാൻ കാരണമെന്ന് ക്രിസ്റ്റി പോലീസിന് മൊഴി നൽകിയിട്ടുണ്ട്. സംഭവസ്ഥലത്തുനിന്ന് കൃത്യത്തിന് ഉപയോഗിച്ച കത്തി പോലീസ് കണ്ടെടുത്തു. പോലീസിന്റെ അന്വേഷണം തുടരുകയാണ്.
തിരുവനന്തപുരം: ഒരു വയസുള്ള കുഞ്ഞിനെ കൊലപ്പെടുത്തിയെന്ന് സംശയം; അമ്മ കസ്റ്റഡിയിൽ
തിരുവനന്തപുരം വിളവൂർക്കൽ പഞ്ചായത്തിലെ മൂലമൺ വാർഡിൽ ഒരു വയസുള്ള പെൺകുഞ്ഞിനെ കഴുത്തറുത്ത നിലയിൽ വീട്ടിൽ കണ്ടെത്തി. സംഭവത്തിൽ കുഞ്ഞിന്റെ അമ്മ 29കാരിയായ ക്രിസ്റ്റിയെ പൊലീസ് കസ്റ്റഡിയിലെടുത്തു. കുടുംബത്തിലെ പ്രശ്നങ്ങളാണ് കൊലപാതകത്തിന് പിന്നിലെന്നാണ് പൊലീസിന്റെ പ്രാഥമിക നിഗമനം.
വ്യാഴാഴ്ച വൈകുന്നേരമാണ് സംഭവം. കുഞ്ഞ് അമ്മയോടൊപ്പം മുറിയിലായിരുന്നു. കുഞ്ഞ് സാധാരണയേക്കാൾ കൂടുതൽ സമയം ഉറങ്ങുന്നത് ശ്രദ്ധയിൽപ്പെട്ട ബന്ധുക്കൾ വാതിൽ തുറക്കാൻ ആവശ്യപ്പെട്ടപ്പോൾ, ക്രിസ്റ്റി പുറത്തുവന്ന് കുഞ്ഞിനെ കൊലപ്പെടുത്തിയതായി അറിയിച്ചതായി അയൽവാസികൾ പറയുന്നു.
ഗുരുതരമായി പരിക്കേറ്റ കുഞ്ഞിനെ ആദ്യം സമീപത്തെ പ്രാഥമികാരോഗ്യ കേന്ദ്രത്തിലും പിന്നീട് തിരുവനന്തപുരം മെഡിക്കൽ കോളേജ് ആശുപത്രിയിലും എത്തിച്ചെങ്കിലും മരണപ്പെടുകയായിരുന്നു. കൊലപാതകത്തിന് ഉപയോഗിച്ചെന്ന് കരുതുന്ന കത്തി കട്ടിലിനടിയിൽ നിന്ന് പൊലീസ് കണ്ടെടുത്തതായി റിപ്പോർട്ടുണ്ട്.
സംഭവത്തിന് ശേഷം ക്രിസ്റ്റി അമിതമായി മരുന്ന് കഴിച്ച് ആത്മഹത്യയ്ക്ക് ശ്രമിച്ചതായി പറഞ്ഞതിനെ തുടർന്ന് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. കുടുംബത്തിൽ ചെറിയ തർക്കങ്ങൾ ഉണ്ടായിരുന്നതായി അയൽവാസികളും വാർഡ് അംഗവും പറയുന്നു. എന്നാൽ കുടുംബത്തിലെ പ്രശ്നങ്ങളുടെ യഥാർത്ഥ സ്വഭാവം പൊലീസ് വിശദമായി അന്വേഷിച്ചുവരികയാണ്.
പുതിയ വിവരം: സെപ്റ്റംബർ 12-ലെ തുടർ റിപ്പോർട്ട് പ്രകാരം, ക്രിസ്റ്റിയെ കോടതി റിമാൻഡ് ചെയ്തിട്ടുണ്ട്. ആരോഗ്യപ്രശ്നങ്ങളെ തുടർന്ന് അവർ ആശുപത്രിയിൽ തുടരുകയാണ്. ആരോഗ്യനില മോശമായതിനാൽ പൊലീസിന് ഇതുവരെ വിശദമായ മൊഴി രേഖപ്പെടുത്താനായിട്ടില്ല. കൊലപാതകത്തിന് കുടുംബപ്രശ്നങ്ങളാണ് കാരണമെന്ന് പ്രാഥമിക ചോദ്യം ചെയ്യലിൽ അവർ പറഞ്ഞതായി പൊലീസ് അറിയിച്ചു.
